/public/article/images/202405/86e5c551-e250-4d29-a00f-ea420b6df751.jpeg)
由知名電影人 王家衛 執導及監製嘅首部電視劇《繁花》登陸香港，6月3號起喺翡翠台首播。《繁花》故事講述90年代上海經濟起飛，遍地黃金機會嘅時代背景下展開，以主角胡歌(寶總)為中心，身邊有三位紅顏知己，馬伊琍(玲子)、唐嫣演(汪小姐)、辛芷蕾(李李)。被稱為上海灘老法師嘅游本昌(爺叔)，為胡歌引路，令佢走進目眩神馳嘅金融世界。
主角寶總係機械工人出身，因被女友拋棄誓要闖出一番事業到上海打拚，拜爺叔為師從事炒股業務，憑藉有勇有謀及過人膽識，搭上改革開放嘅順風車，搖身成為黃河路上最有影響力嘅大老闆。寶總喺商場上運籌帷幄，但卻滿身情債，跟李李、玲子、汪小姐有糾纏不清嘅瓜葛。
胡歌主演嘅《繁花》6月初於翡翠台首播
玲子係黃河路上夜東京嘅老闆娘，為人八面玲瓏，係寶總堅實戰友同時心繫對方。汪小姐喺外貿公司從事白領工作，性格純真，佢同寶總識於微時，一直為佢事業給予支持，經過公司內鬥後，令佢睇清現實，開始為自己奮鬥拚搏。神秘女郎李李空降黃河路，開設至真園飯店，李李性格獨立自信，舉手投足充滿魅力，同寶總之間分不清敵友，當中又夾雜曖昧，迷霧背後隱藏不為人知嘅身份。爺叔喺上海股壇無人不識，係寶總嘅恩師、貴人、兼軍師，憑深厚嘅人脈及商業經驗，成就寶總事業。
劇集圍繞90年代經濟起飛嘅上海作故事背景
《繁花》去年底喺內地播出後，被評為「2024年必追陸劇」，引發不少熱話，劇中主角身價亦隨熱度水漲船高。胡歌過去憑《仙劍奇俠傳》、《琅琊榜》等作品走紅。自主演嘅《繁花》推出後，佢再度被「封神」，甚至出現咗「胡歌爆劇玄學」嘅學說，其實係網民戲稱胡歌成功係結合努力、天賦加點運氣嘅成就。
馬伊琍同胡歌之間嘅關係似夢迷離
馬伊琍亦人氣飆升，令佢演藝生涯再創高峯。汪小姐嘅角色令唐嫣演藝事業也再度活躍起來，創下一個月狂接12個商演通告紀錄。辛芷蕾喺劇集登場後，追縱佢嘅粉絲一下子增加過百萬，更獲法國某大品牌委任為大使，又出席今年巴黎高訂服裝周大騷，待遇直迫影后周迅。有媒體預測今年上海電視節白玉蘭視后，將成為繁花三美綻放時。
唐嫣嘅演藝事業亦因呢部劇而再創高峯
此外，現年90歲「爺叔」游本昌係話劇演員出身，1986年演出電視劇《濟公》走紅，但為咗照顧病妻毅然放棄事業。事隔37年多參與《繁花》演出，令觀眾驚為天人，戲中佢教導胡歌老上海生意經「派頭、噱頭、苗頭」被奉為金句。
《繁花》6月3號 起 星期一至五晚 21:30 翡翠台
