學神爸媽Get Set Go！｜ 5.30首播丨任務成功率不及張寶兒 吳若希封Bowie為完美媽咪

全新育兒真人騷節目《學神爸媽Get Set Go！》嚟緊5月30號首播，一共四集嘅節目分別搵嚟「學神爸媽」 袁偉豪 張寶兒 ，以及「老手爸媽」 森美 同 吳若希 齊齊接受連串「育兒」挑戰，仲有兒童心理學博士Rosa同臨床心理學博士Ming即場分析及點評各人表現。

新節目《學神爸媽Get Set Go！》30號首播

舊年11月誕下囝囝「袁咕碌」袁晞祐嘅Ben同Bowie，錄影期間湊仔經驗只有五個多月：「我哋每一日都喺度諗袁咕碌嗌兩聲係代表啲咩呢？需要每日去學點解讀佢嘅需要，所以我哋要請人幫一幫我哋。」Ben仲賣口乖向老婆Bowie笠高帽：「你湊仔年資唔止五個月呀，計埋我呀，七年。」Bowie即冧爆：「係呀，7年零5個月。」

P牌父母阿Ben同Bowie似乎會學到唔少寶貴知識已有一子一女嘅吳若希亦有唔少經驗可以分享

製作組搵咗4位年齡介乎3至10歲嘅素人小朋友作為「個案主角」，叫得「個案主角」自然各有各「撠手」。首周兩位小主角分別有「不願意分享」同「乖得滯」兩大令父母極為頭痛嘅問題，到底兩位「學神爸媽」以及第一周「老手爸媽」代表吳若希會點解決？

子女已經長大嘅森美，要再同幾位素人小朋友相處又會遇到咩問題呢？

除咗個案夠撠手，Ben、Bowie同Jinny仲要接受製作組安排嘅唔同難度任務考驗，令人意外係湊小朋友年資長達7年嘅Jinny，成功率竟然唔及Bowie，難怪Jinny都讚Bowie係Perfect Mummy：「我覺得Bowie係100分」。

經過唔少考驗之後，Bowie獲Jinny大讚仲比足100分

《學神爸媽Get Set Go！》5月30號起 逢星期四、五晚 22:30 翡翠台