譚輝智開騷挑戰郭富城經典 施展獨門舞技笑指嚇驚觀眾

中聲2人氣王 譚輝智 嘅處男個唱喺26日舉行，開騷前輝智一直密密綵排，喺歌單中竟然大膽挑戰舞台皇者郭富城(Aaron)嘅快歌《有效日期》，呢日見輝智同女舞蹈員排舞時，繼續施展佢嘅獨門舞技。

相信輝智嘅跳唱必定為觀眾帶來驚喜，但當輝智聽到「驚喜」兩字時，竟然係話會帶畀大家「有驚」，喜就唔知。輝智指演唱會有十幾首經典快歌，勾起觀眾回憶。而輝智喺舞台上嘅舞姿一直都係焦點之一，佢形容今次係超乎能力，會突破自己，雖然好多舞步已經簡化咗，但對佢來講都好有難度。

講到迎接演唱會嘅準備，輝智就以早瞓同食清啲加多做運動嚟應付，不過由於要採排未必有充足休息，又要嚴厲戒口，之前佢無辣不歡，但為咗開騷生活上作出好多改變，難怪佢都話覺得自己好癲，而且無得食辣搞到個人身體有啲異樣。