StarTalk一氣呵成版丨林峯感恩古天樂演藝路提攜 角色獲觀眾認同證付出冇白費

林峯 最近喺一套以九龍城寨作為故事背景嘅電影中，演出角色獲觀眾好評，電影票房亦榮登本港華語片第三位。呢日佢作客《StarTalk》接受主播 王鎮泉 訪問，見到票房佳績，佢都好感動，因為拍攝期間遇上疫情，成個團隊喺幾個月入面係互相鼓勵去完成。

身處城寨場景當中，林峯話四個月拍攝時間，每日都覺得成個景好真，好敬佩每位前輩喺唔同環節都認真去做到高水準，令作為演員嘅自己都要落力拍先對得住大家嘅付出。

戲中同洪金寶、古天樂同任賢齊等一眾資深前輩合作，林峯直認心情興奮，好期待同大家擦出火花，而佢對小齊一場激烈嘅對手戲，更加令佢斷咗十字韌帶。佢又大讚谷垣健治武指團隊專業，因為每場打鬥場面，武指團隊會先做一次兼拍底，等佢哋演員知道點打，林峯話每次見到啲片都覺得係咪做到，好誇張。

再度跟古天樂合作，今次兩人喺戲中關係同劇集《尋泰記》有啲近似，林峯就指同古仔亦師亦友，好感恩入行時認識古仔，而家仲做埋自己老闆，多年嚟照顧同提點令佢獲益良多，佢仲話初入行時對住古仔都有戰戰兢兢感覺，問到佢有冇睇番《尋泰記》演出？林峯就話冇，主要係睇返近作，睇吓可唔可以將對角色嘅理解喺畫面做到出嚟。

對於觀眾大讚今次電影角色演技脫胎換骨，林峯話好開心演員嘅努力同付出得到觀眾認同，同埋見到咁多人入場支持電影業，未來好想拍得多作品畀大家欣賞。