星光路上足本版｜鄭則士認因貪慕虛榮入行 視周潤發為演藝路上大恩人

Kent哥鄭則士相隔5年再返TVB參演熱播劇《神耆小子》，飾演夠霸道又鬼馬嘅錢大海，跟戲中每位演員嘅對手戲都充滿火花。為咗令觀眾對Kent哥加深認識，主播 潘盈慧 就邀請Kent哥作客《星光路上》。從演47年嘅Kent哥話演藝夢源自7歲時，佢話自己貪慕虛榮，好想似馮寶寶咁過多姿多采演藝生活。

喺76年參加《聲寶片場》比賽贏到冠軍兼獲得一張合約，極之孝順嘅Kent哥眼濕濕話感激當年媽咪支持，令佢改變一生。入行後參與節目《Bang Bang咁嘅聲》時，就同周潤發培養出友誼，佢話兩人當年每晚都傾演技、劇本同拍法，足足傾咗幾年，所以累積咗好多想法，佢充滿感恩之心話要好多謝發哥，啟蒙佢嘅演戲，令一家人生活無憂，係佢嘅大恩人。

投入電影界創作出代表人物「肥貓」，Kent哥自認當年抱自私心態去自編自導自演角色，因為想藉角色出現男主角再入圍《金像獎》，最終名成利就。從演多年，合作藝人無數，Kent哥表示跟陳煒合作已經唔使默契，經已係互相信任，感覺好似佢妹妹一樣。另外同樣合作愉快兼無顧忌嘅仲有邵美琪同苑瓊丹。