草蜢新歌單新衫澳門開唱 預告暑假星州內地演出

早前為《芷珊約您》擔任嘉賓，分享成團多年來難忘片段嘅 草蜢 ，演出一直未停過。好似上星期六又喺澳門舉行《草蜢金夜狂熱音樂會》。雖然呢次係為酒店VIP專屬演出，不過草蜢一樣對歌單同衣著都有極高要求，除咗演出前一晚細心綵排，開show當日更一直同Dancers仲有樂手商討可以改善嘅細節，連舞台服裝都係為呢次演出全新添置。

草蜢日前到澳門以新歌單演出
 
草蜢一開場就接連表演多首快歌，好似《三分鐘放縱》、《一路順風》仲有《限時專送ABC》等，令現場氣氛非常熱烈。之後又獻唱《寶貝對不起》，蔡一智 同 蘇志威 更到台下同觀眾近距離握手同合照， 蔡一傑 則喺台上同台邊觀眾握手，將音樂會氣氛推到頂峰。

呢日三子亦都有獨唱環節，好似傑仔就唱出《失樂園》
 
呢晚三子亦各自獨唱，蔡一傑嘅《失樂園》，蘇志威演繹《深淵》仲有蔡一智獻唱《看海的日子》，連串經典慢歌

蘇志威呢晚就演繹《深淵》蔡一智則獻唱《看海的日子》
 
蘇老闆事後指現場觀眾非常熱情，佢話：「以往都做過好多呢類VIP Show，但今晚係去到一個沸點、爆棚嘅地步。」而傑仔就自爆大家未必發現自己發生蝦碌事件：「因為台下有講國語嘅朋友，又有講廣東話嘅朋友，所以歌單上兩種語言都有，一時唱廣東話一時唱國語，搞到我有少少錯亂。」
 
而草蜢呢日亦首次獻唱佢哋嘅全新作品《Framily》，阿智就好開心咁話：「今日有新歌帶俾大家，係我寫嘅新歌《Framily》，我見台下觀眾嘅反應都好好。」

佢哋亦為呢晚準備全新歌衫上台
 
傑仔又指，事前已夾定要以「銀」、「紅」兩個顏色出場，之後各自搜羅戰衣：「平日我哋要好勤力行街睇衫，因為大家對顏色都各有喜好，又要搵啲衫可以上得舞台，大家都知草蜢啲衫有幾勁，其實今日我哋先見到對方著嘅衫，只係之前夾咗顏色，呢個就係默契。」
 
佢哋又提到7、8月仲會繼續有演出，傑仔話：「7月19同20號會喺新加坡開兩場演唱會，其實而家都冇分，除咗新加坡，馬來西亞、台灣、香港、國內嘅朋友都會飛嚟睇，所以草蜢每次開演唱會都係一個大party。」

仲預告暑假期間一直都會有其他演出安排呀
 
而蘇老闆亦講到8月就會到廣東開騷：「仲有我哋8月17號會喺佛山開，好多住廣州嘅朋友都應承會過去支持我哋。」