金式森林｜郭晉安離婚後首露面 劇中與陳曉華演忘年戀

郭晉安 同 歐倩怡 喺月初無預警宣布離婚，結束18年婚姻，令外界相當震驚。事隔接近一個月，安仔呢日為新劇《金式森林》試造型，首度面對傳媒，佢大方回應婚變。安仔指同前妻關係仍然好好，大家亦可以做到再見亦是朋友。佢又話已經適應新嘅生活模式，而家就同一對兒女一齊住，而對於外界嘅猜測同流言蜚語，安仔表示心情未受影響。

回復單身嘅安仔，照顧仔女嘅同時，亦都好努力為新劇做準備，佢今次喺劇中會同細佢30年嘅陳曉華發展一段忘年戀，安仔都話都好期待，佢仲話Hera有好多自己嘅諗法，安仔話會比好大嘅強心針拍檔，希望Hera喺劇中有好好嘅發揮。

而今次Hera嘅角色極富挑戰性，事關佢喺劇中有 何廣沛 陳浚霆 同 羅天宇 三個繼子，以及 莊子璇 呢個繼女。而 何依婷 就係佢嘅大新抱，至於有機會同安仔演感情戲，Hera就話要趁機偷師，希望自己有更大進步。至於何依婷喺劇中就要努力為老公爭家產。

羅子溢 同 郭柏妍 喺劇中就飾演兩兄妹，近日子溢喺另一套劇《家族榮耀之繼承者》中同 梁洛妍 上演激情場口，引起唔少話題，子溢話唔擔心太太楊茜堯呷醋，亦都唔怕好兄弟 洪永城 眼火爆呀。

同樣有份演出《家族榮耀之繼承者》，飾演佘詩曼媽咪嘅龔慈恩，亦有現身記招，相信觀眾非常期待龔姐再發揮精湛演技為劇集擦出火花。

陳星妤 係劇中演安仔嘅二新抱，可以同安仔呢位視帝級前輩合作，佢都覺得好興奮，佢仲話安仔係佢嘅偶像添，而身旁嘅Hilary亦都大讚安仔好温柔又有氣場，佢仲話為咗呢次嘅角色做足準備呀。