招牌配音報幕蕭亮被瘋傳加國離世 近年網上分享生活親友未能證實

招牌聲線深入民心嘅甘草報幕 蕭亮 ，今日突然瘋傳佢月前已於加拿大離世嘅消息，惟除網上傳言之外，暫時無親友可以證實消息真偽。其兄長 盧遠 受訪時指雙方多年來未有聯絡，希望係誤傳，而同佢一樣曾為TVB藝人嘅「Gag王」 盧大偉 2016年已離世。

原名盧永華嘅 蕭亮 ，早於上世紀70年代加入廣播行業，當時於電台擔任主持與DJ等職務，後來轉投電視界，一把先天抑揚頓挫嘅靚聲，令佢先後為本港兩間電視台擔任報幕多年，更有「配音王」稱號，無論係讀足多年嘅「無綫電視翡翠台」呼號，定百貨公司每周特價靚貨，都係一代人嘅共同回憶。

由節目預告、重大獎項，甚至直到後期現身幕前，蕭亮都以獨特風格令觀眾留下深刻印象，直至90年代與家人移民加拿大之後，都繼續以天賦靚聲開咪，仲一人模仿多角甚至唔同聲效生動講故事。

2000年蕭亮離婚回流返港，重返TVB後現身幕前，參演唔同劇集，好似《男親女愛》中嘅滑頭算爆律師行老闆CK，就最令人有深刻印象。當年仲有指佢因經常攝位而有「老薑攝石人」封號。佢喺《皆大歡喜》中扮演 半日仙 亦一樣生鬼搞怪，直至2011年，佢拍畢《七號差館》就重返加國定居，不過仍不時於網上平台錄音與聽眾交流。

頻道近月一直未有更新，有人就留言聲稱，蕭亮月前已經離世嘅消息。