學神爸媽Get Set Go｜吳若希被女兒嫌棄智商低 袁偉豪張寶兒育兒方式有異

吳若希Jinny 同新手爸媽 袁偉豪Ben、張寶兒Bowie 一齊上節目《學神爸媽Get Set Go》做嘉賓，Bowie同Jinny要接受任務，喺半小時內成功氹小朋友唱歌，兩孩之母嘅Jinny不廢吹灰之力就挑戰成功。

回歸現實生活，Jinny同大女嘅相處充滿趣味，自認性格大懵嘅Jinny曾經試過將囡囡電話整到手機殼上面，被女兒問到點解咁做時，Jinny辯解：「當人哋執到你電話可以打返畀你嘛，點知阿女話人哋執到個電話只係你手中電話會響，我諗諗吓又有道理喎，自己都冇醒起，畀佢寸咗一吓，我覺得阿女呢方面係優秀嘅。」

講到醒目，Jinny就大讚Bowie呢位新手媽媽好多嘢無師自通，育兒方向好正確，期待Bowie同Ben嘅小朋友長大，仲推測佢一定會係學霸，非常聰明又識得照顧人嘅BB。

Bowie為咗做一個稱職媽媽，背後好努力增值自己，早前就專登請咗位註冊護士返屋企，教佢嬰兒急救知識，覺得呢個方法對父母嚟講安全感較大，例如BB因為一啲分泌刺激到條脷或係真係作嘔等不同常識。Bowie經常睇書參考湊B方法，尤其係面對小朋友情緒失控時應該點處理，呢方面Bowie同Ben有不同見解，Ben認為太太湊小朋友有自己一套，但佢有時見到BB喊就會於心不忍，Bowie覺得老公好多時認為唔立即處理驚令BB有陰影，但實情係要正確疏導緊BB嘅情緒，所以喺節目上都有反思到自己對育兒進步空間。