成日都有古怪想法嘅 林盛斌 ，近年為咗一家四個小朋友努力發展唔同事業，棟篤笑演出更開勻世界各地又不時分享面對人生嘅正面態度。不過近日情況就似乎有變喇，因為阿Bob嘅大女 林霏兒 已經16歲，呢日阿Bob同「前世情人」合照出Post，就忍唔住表達自己嘅擔心同不安喇。
身為三女一子之父嘅佢話：「大家姐，霏霏，咁就16歲。呢啲款，我細個嗰陣，溝硬，唉，真係越嚟越擔心……」不過留言嘅大家，除咗祝霏霏生日快樂之外，仲有人落井下石，嚇阿Bob好快就會升任外父，搞到佢隨時更加好似熱鍋上嘅螞蟻咁囉囉攣呀。
而轉眼已經成為少女嘅霏霏，更被指同不時都有同Daddy合作嘅華姐冠軍 余思霆 撞樣，就以阿Bob貼出嘅相為例真係非常相似，相信阿Bob聽到就更加唔知開心定更擔心喇。
