大型玩水音樂派對移師香港舉行 性感女神泫雅超短熱褲騷蜜桃臀

國際殿堂級HipHop派對 「WATERBOMB HONG KONG 2024」 昨日喺香港開鑼，第一場有韓星Jay Park以及韓國性感歌手泫雅登場！

韓國性感歌手泫雅大跳辣身舞。

泫雅之前認愛HIGHLIGHT前成員龍俊亨，沐浴喺愛河中嘅泫雅真係上足電，一出場用廣東話與Fans打招呼，泫雅雖然唔及其他地方嘅玩水派對打扮得咁性感，但係佢依然以魚網絲襪加超短熱褲上陣，展示蜜桃臀線條，泫雅以招牌式勁歌熱舞獻唱《Q&A》、《I’m Not Cool》炒熱氣氛之外，亦風騷大派飛吻，仲要全場大合唱添：「大家好，我係泫雅！雖然我哋嘅語言唔一樣，但係大家都跟住我一齊唱，你地好犀利啊！希望呢首歌喺你哋失意嘅時候，成為你地嘅力量！今日雖然係WaterBomb，但我覺得你哋好似仲濕啲，我好驚你哋感冒啊！」泫雅關心完觀眾不久後，唔知係咪現場氣氛太高漲，有女觀眾不適倒地，需要保安同救護人員送離現場救治。
魚網絲襪配超短熱褲展示蜜桃臀。
而Jay Park就壓軸登場，走型格路線嘅佢衣著上未有刻意騷肌，著上白色外套加短褲，全場八千位Fans即時高漲，佢都好識做冧fans，仲用水槍射向大家增加氣氛：「你哋攰唔攰啊？ 我見到你哋㗎。你哋覺得點啊？大家好，我係Jay Park！」雖然不時落雨，但無阻粉絲熱情，佢近走近台邊同Fans交流。
大型玩水音樂派對移師香港舉行。