Jessica訪台不忘約王心凌聯誼 爆泰國神顏參賽問意見

少女時代前成員Jessica，呢日悉心打扮到台灣出席代言活動，佢以一身Deep V短裙閃閃打扮大騷好身材。Jessica呢次訪台提前到埗，特別約早前喺內地選秀節目中，認識嘅老友 王心凌 聚舊，齊齊食鐵板燒上戴到限時動態。

傳媒當然非常有興趣知兩位姐姐會唔會傾合作大計，而Jessica就透露兩人飯局上除咗享用美食之外，同心凌全程以英語、中文同韓文溝通，完全零語言障礙，佢仲敎心凌韓文，至於係咩就係秘密咁話喎。

講起新一輯姐姐選秀節目開播，原來有份參加嘅泰國神顏 DAVIKA 都有向Jessica請教﹐Jessica透露兩人喺多年前一個意大利嘅時裝騷度認識，佢提醒DAVIKA只要做自己，展示美態就可以，仲讚對方表現得好好。

呢次活動同時尚配飾有關， Jessica都分享自己心中嘅Fashion Icon係媽咪。Jessica話從小就成日睇媽媽收藏嘅時尚雜誌，又會跟媽咪一齊去買衫，培養唔少時尚觸覺。佢仲話睇返家庭照，大讚媽咪嘅衣著依然好合潮流，難怪佢同妹妹Krystal既衣著打扮都大獲好評，相信係遺傳自佢地嘅媽咪。