雲浩影變眼鏡娘可愛再加分 三年級做四眼妹自認薯嘜

雲浩影變眼鏡娘可愛再加分 三年級做四眼妹自認薯嘜

近年唔少朋友都對眼鏡嘅款式越來越重視,而美少女戴上眼鏡就仲會變得更加文青變身可愛「眼鏡娘」, 雲浩影 近日就應品牌邀請示範一系列日本手造眼鏡,首次以眼鏡造型影宣傳照嘅佢仲相當興奮。

Cloud話:「大家都知我平時私底下都係四眼妹,眼鏡對我嚟講係最好嘅夥伴,由起身嗰刻到臨瞓前都需要佢。雖然而家工作多數都會戴隱形眼鏡,但係當我想畀大家睇到唔同感覺嗰陣,又可以用眼鏡襯唔同造型,所以眼鏡唔止係生活必需品,仲係實用嘅時尚單品。」

四眼妹雲浩影近日拍攝眼鏡廣告,仲分享自己戴眼鏡多年嘅經驗

呢次Cloud以一黑一白的造型拍攝,白色嘅貼身連身裙散發優雅味道,而黑色透視造型就有少少叛逆感覺。呢日拍攝時,Cloud就把握機會試戴唔同款式:「平時冇咁多時間逐副慢慢試,今次名正言順任戴,原來同框唔同色,或者同色唔同框都好大分別。我多數戴方框眼鏡,因為感覺上好似斯文啲,今次有好多圓框款,估唔到感覺都幾cute。」

自三年級已經戴眼鏡嘅佢,仲認為戴咗眼鏡突顯斯文特質

小學三年級時已經成為四眼妹嘅佢,仲分享細個時嘅古怪諗法:「細個嗰陣唔知點解覺得戴眼鏡好有型,好似特別斯文同埋讀書會特別叻咁。嗰時都開始有『靚』呢個概念,以為自己戴眼鏡會好睇,點知揀咗一副好薯嘅款式,搞到每日都唔想戴,好醜怪。」

Cloud近來推出唔少情歌都非常受歡迎,而問到單身嘅佢嘅擇偶條件時,眼鏡男會唔會加分?佢就話:「如果夠斯文又有型咁戴眼鏡都會加分,不過都係想做嘢行先,唔諗咁多住,啱啱出咗新碟要做好多宣傳,大家記得多多支持就真。」

 相關推薦

熱門搜尋