林奕匡新曲歌詞首與Wyman合作 拍MV偷師金像獎得主滿身瘀痕

林奕匡 早前完成音樂會，之後隨即推出新歌《波希米亞(沒有)狂想曲》，新作由Phil自己作曲，又邀請到 黃偉文 填詞，成為佢出道以來首次獨唱嘅Wyman作品。Wyman因為Phil嘅「唱作人」身份，喺歌詞中以「波希米亞」呢種代表自由、浪漫、無拘無束嘅概念，表達創作漸被輕視嘅時代下，喺各行各業下堅持自我、默默耕耘嘅一眾「創作者」心聲。

阿Phil嘅新歌《波希米亞(沒有)狂想曲》早前推出

Phil話錄音時，Wyman亦特別塑造一個情景等自己更易投入：「啱啱收到份歌詞，佢（Wyman）就話：『阿 Phil 你幻想如果呢個世界無咗音樂』去唱呢隻歌。」

新歌MV拍攝又邀請咗兩部話題港片《白日之下》仲有《年少日記》嘅演員，好似出爐「最佳男配角」姜大偉，同埋小演員 何珀廉 參演，扮演Phil嘅老年同少年時期。原來今次仲係John哥入行以來嘅首個演出MV，Phil仲驚嘆John哥嘅專業：「John哥拍攝時會睇住我點拎起本書、手點擺，跟到一模一樣！」

MV仲邀請咗姜大偉，同埋小演員何珀廉合作阿Phil同John哥首次合作，就大讚前輩觀察入微

Phi亦有份演出新歌MV，期間除咗要同兩位電影演員「對戲」，仲要被其他演員不斷投擲「漆蛋」。唔止由頸到腳全身油漆，拍完後仲發現自己渾身瘀傷，不過Phil就指忍痛並非最難：「成百隻蛋飛埋嚟一定會想避，但係盡量要保持『Poker Face』真係有啲難度。」

被漆蛋圍攻嘅佢，事後發現滿身瘀傷