王梓軒38歲生日Fans預祝歌影視齊飛 赴歐遇偶像交流錄音同步拍MV

星期一踏入38歲生日嘅 王梓軒 ，同一眾Fans一齊參與生日Party，佢Jonathan亦為大家獻唱答謝支持，期間又分享咗嘅歐洲之旅，仲預告下半年嘅歌影視大計。除咗會開拍劇集同電影，佢仲會以監製身份籌辦大型音樂節，部份計劃仲已經籌備幾年咁耐喇。

王梓軒踏入38歲，同Fans一齊慶祝生日

呢日Fans亦為佢準備巨型立體蛋糕，預祝Johnthan歌影視齊飛，壽星亦興奮咁話：「蛋糕底層係菲林，仲整咗我啲相喺度，中間係個舞台，啲音符好似衝上雲霄咁。又有晒射燈，每盞都着到，上面仲有隻飛機環遊全世界。我諗佢哋係寓意我哋嘅歌影視、台前同幕後嘅工作，都可以遍佈地球，好多謝佢哋嘅願景。」

Johnathan完成同 陳潔儀 仲有 劉松仁 合作嘅音樂劇《利瑪竇》之後，隨便出發到歐洲工作之旅，先後到訪羅馬、康城同維也納。佢先到康城電影節為兩齣籌備中嘅電影賣片花：「我哋去嗰邊做預售，睇吓有冇買家有興趣，幸好又真係有喎。除咗係我哋自己個計劃，今次仲喺當地認識咗好多電影人。」

佢一完成舞台劇就飛往康城影展，推銷自己嘅片花

此行另一驚喜，係遇上 張艾嘉 同日本男星 山田孝之 ，Jonathan把握機會交流，仲獲分享唔少製作電影嘅經驗：「我自己好鍾意睇山田孝之嘅作品，得到好多啟發，佢真係好出色，形象同演技都咁多變，好想拜佢為師學吓嘢，有機會都好想邀請佢合作。而張姐(張艾嘉)就喺一個電影項目上俾咗好多意見我，我覺得非常感恩。」

又喺現場遇到山田孝之同張艾嘉

之後佢又趁機到羅馬，同當地劇場業人員交流，仲特別到訪利瑪竇神父嘅母校——羅馬學院(Roman College)開眼界。完成羅馬朝聖之旅後，佢就隨便起程到維也納造歌，不過一抵埗即發生蝦碌事件：「我同當地一啲好有才華嘅音樂人合作，飛到去維也納已經凌晨，我仲要拎錯咗行李，搞咗一大輪。之後即刻就要去Studio錄音，錄完仲拍埋MV。好辛苦大家，但係又好開心。」

之後佢又分別到訪羅馬同到維也納錄音

至於下半年嘅影視大計，佢指早前發佈嘅劇集《網內人》已密鑼緊鼓籌備中，預計明年可以開拍。而音樂方面，佢年底將作個人演出，又會以製作人身份籌辦大型音樂節：「又係密鑼緊鼓啦，年尾要做而家開始籌備都好趕，不過我嘅團隊好勁，希望可以做啲好嘢畀大家睇。」