馮允謙再為新歌拍新版MV 自爆拍攝時要壓制自己

馮允謙早前推出新歌，負責填詞嘅Wyman黃偉文，坦言喺寫歌詞時，腦入面有兩個唔同嘅演繹方法，一個係歇斯底里式怒火大爆炸版，另一個係姣斯躉篤版，而Jay Fung最後選擇咗前者。
Jay Fung為新歌拍攝另一個版本嘅MV。
不過最近Jay Fung就發掘出第三個版本 — a cappella版，佢仲邀請咗The Kickvoxers一起演出，Jay Fung話：「佢哋其中一位成員Guddy係我嘅唱歌老師，佢幫咗我好多，由我兩年前第一次喺九展開演唱會，到舊年去紅館開show，我好需要vocal stamina（聲韻耐力），去令自己把聲更強，佢真係幫咗我好多。」
新版同 A Cappella合作。
Jay Fung話自己想做一個新版本好耐，同同事傾完後先決定試下比較少接觸嘅a capella。Jay Fung又為大家解說自己演繹兩個版本嘅分別：「原裝版會比較憤怒、激情，但今次a cappella version，因為要配合大家把聲，所以呢個版本會收埋啲，會cool少少。」Jay Fung又分享一單拍MV時嘅笑料，佢話：「我記得我喺錄音室錄呢隻歌嘅時候，有一個習慣，我對手會不期然有好多好誇張嘅手部動作，但原來喺鏡頭面前做呢啲動作，會好奇怪，所以剛才唱嘅時候，雙手好想郁，但又要壓制住自己，最終拍咗四、五個take，自己都好滿意，希望大家都鍾意呢個版本。」
Jay Fung話自己拍MV時要壓制住自己。
至於問到Jay Fung有沒有考慮試玩a cappella？佢話去年12月同另一隊a cappella 合作，由於當時自己都係專注主音部份，所以和音嘅工作交返俾對方，Jay Fung話自己都想試吓唔唱主音，嘗試自己完全唔識嘅beatbox，佢仲話聽講釗峰識beatbox，可以搵對方一齊玩吓呀！