鮑比達組最強組合開音樂會 與萬芳隔31年終真正合作

「亞洲流行音樂教父」 鮑比達 胡琳 萬芳 呢日聯同 香港中樂團 為即將舉行嘅音樂會進行綵排，呢次亦係Bianca同鮑比達繼2017年喺《風雲》音樂劇後再度合作，Bianca都話，可以唱返《天意弄人》呢首歌令佢勾起唔少當年回憶。
 
音樂會結合香港中樂團以及兩位實力歌手，令鮑比達都形容呢個係強勁組合，大師亦非常期待呢次演出。佢唔只大讚萬芳夠專業，仲讚Bianca聲音最有音樂劇味道，一聽到佢把聲就已經好驚喜。至於 周熙杰 就係第一次同兩位合作，佢就話雖然兩位唱歌風格唔同，但亦係好事一件，因為中樂團最愛就係同唔同風格嘅歌手合作。
 
萬芳雖然喺1993年主唱鮑比達創作嘅《新不了情》，但二人其實當年未有真正合作。相隔31年後，二人終於有首次同台合作機會，都令兩位非常開心，覺得一切都係緣分驅使。萬芳就話，呢次演出最特別嘅就係演唱由中樂團改編版本嘅《新不了情》，喺綵排時佢亦感受到31年前唱呢首歌嘅自己以及對歌詞嘅理解同意境。