早前爆出已成為新手Daddy嘅 林德信 ，為咗前世情人嘅成長，工作亦絕不鬆懈，最後除咗忙湊小朋友之外，亦持續創作，仲同歌手 鄭嘉嘉 ，合作製作新歌《Drifting in Hyperspace(超空間)》，Alex負責Rap嘅部份而嘉嘉就主唱普通話，以8、90年代曲風融入現代節奏。
早前佢哋為新歌拍攝MV，以神秘又有懷舊感嘅深紅服飾，仲有幾近漆黑嘅場地，帶出過往尋開心又不醉無歸嘅的士高味道。
Alex說：「呢首歌創作時參考過導演David Lynch的作風，所以MV都係超現實、暗黑風格，亦用咗好多懷舊道具布景。80年代嘅香港係好開心，夜生活亦好豐富，好多人都會去跳下舞，就好似今次MV以Disco做場景， 服裝又有點復古，就係想向80年代致敬。」
Alex又指自己玩音樂之餘，亦不時會到夜店聽音樂：「好多時玩到深夜3、4點，會去After Hours Club再玩，聽到音樂就想跳舞，所以創作Hyperspace概念，就係想帶俾大家呢種空間感，享受音樂、享受跳舞。 」
而鄭嘉嘉就解釋以普通話獻唱新歌嘅原因 :「 我哋覺得普通話會容易表達歌曲嘅意思，其實外國好多歌都係男仔Rap，女仔負責唱，只不過大中華市場就比較少。而Hyperspace係想帶大家超越空間，離開地球，離開壓力嘅地方，喺呢個空間就只有音樂，好歡樂。」
雖然嘉嘉表示自己冇去Disco嘅經驗，不過對Disco音樂就毫不陌生，好似Bee Gees、Babylon、ABBA、MJ嘅音樂自己都非常鍾意。而Alex仲話新歌有電子音樂元素，新歌音樂節拍強勁，所以Alex同嘉嘉都要勤力練舞。
Alex話 : 「嘉嘉跳舞比我好得多，我就真係要苦練，以前拎住結他，以創作歌手形象出現 ，但Hyperspace要有好多能量，我同嘉嘉要放低樂器出嚟跳舞，所以要上堂學，甚至重新學唱歌，唱住歌跳舞同唱彈結他唱歌真係好唔同。」