「大姐明」林建明因健康問題淡出幕前，近年享受半退休生活，一向人緣極佳嘅大姐明，相識滿天下，不時相約跟老友聚舊，生活過得寫意，生活不愁寂寞，大姐明日前跟邵氏電影第一期訓練班同學聚會，相中見到佢同莫如歐、郭鋒及關偉麟一齊相約敘舊，大姐明更貼出昔日同學合照。
大姐明指第一屆訓練班同學莫如歐從外地回港度假，相約同學仔見面，眾人相識53年，呢段友情確係難能可貴，佢哋都希望7月份再聚，更希望有興趣嘅同學仔們可以約埋一齊出嚟，大姐明更貼出昔日同學大合照剪報，笑指「如果有失憶的話，可以在圖中找尋自己的名字」，期待更多失聯嘅第一屆訓練班同學「自動獻身」。
呢次林建明先與莫如歐、郭鋒及關偉麟見面，網民大讚個個都keep得好好，林建明當年考入邵氏電影第一期訓練班，同期同學有黃元申、李修賢、米雪（嚴慧玲）、張午郎、許冠英、傅聲（張富聲） 及「香港鏢王」美譽嘅何禮男等，畢業後各人發展均能獨當一面；而網民見到大姐明同郭鋒同場，想起經典劇集《季節》，郭鋒飾演唐貴全，而大姐明演大Dee老婆。