講到「二樓後座」，大家都會諗起殿堂級樂隊Beyond，呢個錄音室誕生咗Beyond一連串經典歌曲，亦係唔少Band友想朝聖嘅地方，但係呢個咁有紀念性嘅地方，將會受重建計劃影響面臨清拆。
樂隊Nowhere Boys早前就襯「二樓後座」清拆前，造訪錄音室錄製佢哋成軍9年第一首情歌《兩秒》，以音樂記錄底呢個咁珍貴嘅地方。首次到訪「二樓後座」嘅Van、Nate同Ken見到玻璃櫃擺滿Beyond嘅唱片同曾經用過嘅音樂器材時，經已好興奮，Ken話：「呢度係Beyond嘅發源地，佢哋一開始喺度Jam歌、排練，後來有足夠嘅金錢就喺呢度做歌。」Van講到「我見到有啲用到好殘嘅Pedal，Ken同我解釋係日本製好勁嘅Pedal，係家駒用過嘅，我見到直頭唔敢掂。」
對於「二樓後座」面臨清拆，Nowhere Boys大感可惜，Van透露希望喺呢條街清拆之前，可以喺度錄多幾首歌，決定咗嚟緊每首歌都會Book呢度錄，直到佢唔再喺度為止。希望可以用我哋嘅音樂、聲音去記錄低呢個地方。