資深演員顏國樑喺上月25號因病離世，享年71歲，遺孀霍潔貞13號為亡夫設靈，靈堂中央放有顏國樑面帶笑容遺照，橫匾寫上往生淨土，喪禮以佛教儀式進行。靈堂內外放滿各界送上花圈，包括薛家燕、關禮傑夫婦同翁靜晶等。
顏國樑生前作客最後一個電視節目《直播靈接觸》，主持梁思浩現身靈堂送別亡友，當佢跟顏太擁抱送上慰問之後，都悲從中來唔住曬出淚水。另外，跟顏國樑相識數十載，樂隊Blue Jeans成員黃良昇亦到來致祭，憶述故友，佢直認非常心痛，並指顏國樑為人風趣幽默，即使面對惡疾煎熬，仍堅強樂觀面對，這點值得學習。講到故友遺願，黃良昇話顏國樑好鍾意音樂，但遺憾唔識彈結他，所以佢就主動教對方，可惜學咗一排之後，顏國樑因為雙手無力而感到辛苦，黃良昇話心知亡友未必學得識，但希望借助過程令對方減壓。
