鄭俊弘 （Fred）與何雁詩（Stephanie）日前宣布2歲兒子Asher不幸確診患上「天使綜合症」，佢哋日前接受電台錄音訪問，帶住正能量笑容呼籲公眾加深認識呢個罕見疾病。
家燕姐讚Fred同何雁詩充滿正能量，坦言同為人母，都會有一段時間難過，好欣賞佢哋嘅堅強同毅力，更為天使綜合症病患者於7月7號舉行籌款音樂會，知道Fred同何雁詩要照顧阿仔，同時為籌備慈善音樂會奔波，希望多啲人關注，好感謝兩位偉大的愛。
身為媽媽兼嫲嫲嘅家燕姐被何雁詩與鄭俊弘堅強感動，一時間感同身受，忍唔住眼濕濕擁抱何雁詩。何雁詩坦言當初確實阿仔患病，用咗一星期時間平復心情，Fred就要用一個月時間平復，作為父母本身已辛苦，只希望為阿仔做到最好，加上佢哋本身對醫學一向都唔認識，更加從未聽過「天使綜合症」。
何雁詩又指收到報告後，覺得難以向父母交代，特別係擔心何爸爸，好驚訝雖然唔開心但好堅強，反而勉勵佢哋要堅強面對；佢哋透露目前阿仔每星期要接受唔同治療，包括物理治療、語言治療、職業治療，佢哋又帶阿仔游水，佢哋十分感謝家人全面協助。