StarTalk｜許靖韻全新慘情歌背後有魔咒 製作團隊相繼宣告「陣亡」

許靖韻 一向擅長演繹慘情歌，呢日佢作客《StarTalk》接受 許文軒 訪問，就封新歌《被吃掉的靈魂》係慘中之慘嘅作品，佢仲大爆新歌如魔咒一樣令作詞人、音樂監製同埋佢本人接連大病。

首先作詞人林若寧以「The Walking Dead」命名初版作品，後來因為歌詞太多喪屍內容要修改，原來作詞當時林若寧大病。而Angela同監製徐浩錄音第一天就感覺被掏空力量，如歌名一樣「靈魂被吃掉」，之後即晚徐浩率先「陣亡」病到入院要求翌日停錄，隔咗半日Angela亦宣告失手發高燒燒咗兩日，之後為關智斌演唱會做嘉賓，更被嘲把聲似電影角色𡃁昆，最後Angela要休息成個月先至回復聲線，重返錄音室繼續錄歌。

Angela早前展開內地巡演﹐開始時佢自爆曾自我質疑擔心售票情況，後來獲3千歌迷入場支持令佢打咗支強心針，後來更因許媽媽場外誤買老翻唱片令佢萌生多出演唱會周邊嘅念頭：「我媽咪喺廣州個騷嘅場館門外買咗一隻我未出過嘅專輯，有我嘅靚相同簽名，製作精美到連我媽咪以為係真，所以之後會花多啲心思出正版CP值高嘅演唱會紀念品。」 Angela同時希望可以小試牛刀回港再開騷。