台灣資深音樂人李坤城同細40年嘅太太林靖恩呢段「爺孫戀」轟動一時，無奈李坤城上年4月病逝後，林靖恩行為頻頻異常失控，有傳佢酗酒兼煙癮大，有屋企唔返走去住酒店，仲因為打爛房間設施被酒店列入黑名單，又因為遺產問題同李坤城兒子李卓軒反目，之後佢仲因為破壞停喺街邊嘅電單車惹上官非要賠錢。而今日脫序行為再添一單，仲相當離奇添。
有網民喺社交平台分享一段片，內容見到一位短髮女子坐喺街邊食麵，事主表示自己只係離開一陣，外賣就俾呢位女子偷走，而且當街大快朵頤，佢唯有報警處理，而期間該名女子毫無悔意，繼續大啖食麵，仲不時怒啤事主。
影片公開後有網民認出嗰位短髮女子就係林靖恩，好多人都好擔心佢嘅情況，又話偷嘢雖然唔啱，但佢好明顯有精神方面嘅問題，仲建議應該將佢強制送醫。而林靖恩就因為竊盜罪被帶到警署，最後偵訊結束由林爸爸接回。
林靖恩嘅爸爸同李坤城係多年老友，當年李坤城經常上林家欣賞黑膠碟，據知佢係因為追求林靖恩家姐不果，進而將目標轉向林靖恩。而林爸爸當年因為不滿女兒不顧反對，執意要同李坤城結婚，嬲到同林靖恩脫離父女關係，不過天下父母心，見到李坤城過身後，林靖恩嘅失控行為，林爸爸始終心有不忍，於是決定接佢返屋企，仲送佢入院戒煙戒酒，估唔到出院短短一星期，林靖恩竟然再度登上新聞版面，令人不勝唏噓。