戴祖儀挑戰空中瑜伽變倒樹蔥 自認表情管理欠奉成地獄pose

空中瑜伽一向俾人優雅嘅感覺，喺半空中一舉手一投足，都好賞心悅目，不過凡事有例外，戴祖儀玩空中瑜伽就完全係另一回事，優雅欠奉之餘，一招倒樹蔥仲俾佢封為地獄pose，不過所謂嘅地獄並唔係難度太高，而且太樣衰呀！

其實Joey之所以會的起心肝練瑜伽，因為佢好快就要投入新劇拍攝，而呢個角色有大量動作場面，本身筋骨好硬嘅Joey就話，希望藉由瑜伽可以鬆下自己嘅筋骨，不過因為自己太怕辛苦，所以每日練半個鐘已經係極限。

Joey早前去到佛山拍攝新劇《刑偵12》，當地出名美食多，令Joey嘅馬甲線爭啲打回原形。不過Joey都未算最失控，佢大爆老友吳業坤食嘢食到直頭變成肥大叔，仲叫觀眾劇集播出時記得留意坤哥嘅肚腩。