陳柏宇（Jason）呢日帶埋囡囡Abigail（Abi）出席商場嘅充氣水果樂園「杏運Summer Fun 2024」揭幕禮，Jason話Abi一聽到有彈床玩，就即刻話要跟埋嚟：「嚟緊放暑假都計劃咗一家人去唔同地方遊玩兼做運動，呢度有齊唔同嘅運動品牌，可以一次過買齊運動裝備，啱晒我同太太湊住兩個小朋友唔駛周圍走！」
活動期間兩父女仲落場同fans Battle，挑戰難度升級版嘅「123紅綠燈」及「彈床糖黐豆」，眾人都玩得相當投入。遊戲過後，Jason又即場獻唱，而Abi則化身最忠實嘅小fans為爸B打氣。
當問到會唔會教兩個囡囡唱歌？Jason就話作為家長，希望提供機會畀小朋友自己去探索：「家姐（Abigail）比較活潑好動，特別鍾意做運動、游水、曬太陽。今個暑假就啱晒佢啦，一家人可以一齊睇國際體育賽事。大家都要多多支持睇直播，為一眾運動員打氣！」
