胡杏兒近日同老公Philip帶3位兒子前往馬爾代夫度假，喺社交平台連日開心分享靚相，見佢哋一家五口曬幸福，杏兒四年抱三，生完B後身材冇走樣，杏兒噚日喺IG貼出身穿背心連身裙，露白滑美背嘅美照，又換上一件頭嘅泳衣，陪阿仔喺泳池玩。
杏兒今日著白色小背心玩瑜伽，動作優美展現身體線條，佢又用懸垂嘅掛布做空中瑜伽，做出不同嘅動作超有線條感，又以倒吊姿勢拉長脊椎、幫助血液循環，見杏兒上布做出各種優雅伸展嘅空中瑜珈姿勢，完全唔似初學者，之後杏兒盡情享受Me time，見佢揀完香薰味就嘆水療浸浴。
杏兒的確對馬爾代夫情有獨鍾，懷孕嗰陣喺馬爾代夫影相宣佈造人成功，同大仔李奕霆（Brendan）第一次旅行嘅地方亦係馬爾代夫，就連同一班胡說八道姐妹都試過到當地展開閨密旅行，更齊齊大曬性感照。
