向來作風低調嘅粵劇名伶白雪仙近年極少出席宴會，甚至連早前96歲生日，仙姐都選擇喺屋企慶祝。近日仙姐盛裝現身契女高太嘅生日晚宴，資深傳媒人汪曼玲亦係座上客，佢喺社交平台分享聚會開心相，見到身穿紅色毛毛背心嘅仙姐神采飛揚。
到嚟祝賀高太嘅親友坐滿10席，包括有汪明荃、羅家英、陳寶珠同仔仔楊天經、梅雪詩、胡楓、姜大衞、李琳琳、劉培基、陳善之同資深傳媒人彭美施等，當晚除咗高太係主角之外，仙姐更係全場焦點，不少徒弟、晚輩都紛紛上前合照，仙姐更係來者不拒同大家閒談影相留念。為咗令來賓玩得盡興，高太除咗準備佳餚，更準備禮物同抽獎環節。
