五月天《回到那一天》25週年巡迴演唱會太原站開鑼，成員石頭因病缺席，歌迷為石頭舉手幅加油打氣，對五月天初出道有知遇之恩嘅任賢齊，呢晚擔任首場嘉賓合唱《突然好想你》。
阿信笑言要小齊拎出凍齡時光機，反問點解25年後嘅小齊哥外貌依然冇變，小齊指每次同五月天一齊，感覺好似回到當年，當時五月天成員讀緊大學，睇住佢哋憑熱血及傻瓜精神，喺音樂路上繼續前進，小齊叫在場觀眾畀啲尖叫聲以示支持五月天。
呢次係五月天首次以4人姿態出場，技師團團長小花代班，由於呢位代班結他手太靚仔，令唔少歌迷眼前一亮，搞到阿信叫大家唔好咁激動，唔好幫人哋開fans club，場面非常搞笑，雖然歌迷對小花好欣賞，不過五迷都好掛住石頭，盼望石頭早日康復，阿信承諾一定會五人一齊重返大原開騷。
