葉麗儀一連兩場演唱會星期六晚開鑼，77歲嘅Frances以Fit爆狀態面對全場爆滿嘅觀眾，身穿綠色晩裝嘅佢由兒子Lewis陪同登上舞台，以一曲《獻出真善美》為演唱會揭開序幕。
Frances呢晚亦喺台上分享唔少家庭、朋友甚至事業嘅故事：「當年參加無綫《聲寶之夜》入行，知道有電視機送，於是報名參加。記得面試時唱了一句《When I said I need You》，評判就話：『得喇！你返去喇！』原來已經入圍，最後仲嬴咗一部手提電視，更認識封煇哥(顧家煇)同霑叔(黃霑)。」
之後佢為觀眾獻唱多首60年代經典金曲，好似《一見你就笑》、《給我一個吻》、《情人的眼淚》、《相思河畔》以及《夢》，又走到台下同觀眾握手，期間仲有歌迷向Frances送上利是。Frances呢晚又指自己曾拍過三部電影，其中喺《難兄難弟》飾演歌女「葉麗珠」，呢晚佢就獻唱戲中歌曲《紙醉金迷》，又邀請拉丁舞高手表演。
Frances演出時又話要為自己平反，因為1989年於新加坡遇到同公司旗下嘅Cliff Richard，傾談時仲講到非常欣賞對方嘅《Ocean Deep》，好適合中文歌詞。後來邀請湯正川填上中文歌詞，但因為當時身為商台DJ，因身份問題歌曲未能於電台播出。而劉美君數年後重唱，大家都以為呢首係劉美君嘅歌曲：「我要平反一下，係我嘅！《Ocean Deep》(愛是無涯)。」
《上海灘》係葉麗儀嘅首本名曲，呢晚佢就講咗一個故事：「當年霑叔錄音前一晚先收到歌，最後用20分鐘填完歌詞。當時，霑叔唔確定上海黃埔江係咪真係有浪？仲特登打電話查問。但『浪奔浪流』實在太順口，決定唔改。」Frances繼續講故事話：「1984年，我喺黃埔江唱《上海灘》，發現原來真係無浪，只有潮。但我好開心一生人有自己嘅招牌歌，係很大嘅福氣。」
到演唱會尾聲，Frances指自己68歲時仍有唱片公司肯簽約，仲邀請崇拜已久嘅區丁玉一齊合作，創作歌曲《記憶裡有愛》：「我希望呢首歌好似今屆奧運運動員一樣，鼓勵年青人珍惜生命、努力向前。無論經歷幾多辛苦，都可以排除困難，面對將來。恭嘉所有得到獎牌嘅香港同中國運動員。」
