「萬能鍾」鍾志光（鍾仔）喺今屆巴黎奧運擔任主持，以專業評述贏得觀眾好評，鍾仔更因連踩將近20個鐘直播，獲網民大讚敬業，鍾仔真係好熱愛工作，噚日佢又貼出開工相，呢次佢為TVB處境劇《愛‧回家之開心速遞》拍外景。
鍾仔雖然忙於奧運主持，不過佢開工依然精神抖擻，喺社交平台貼出兩張開工照，並搞笑指「日頭做返佳叔，夜晚奧運繼續」，可見佢體力驚人，難怪同劇演員合照時要畀鍾仔一個讚。網民紛紛留言「小心身體，不過冇咗你個電視又唔好睇」、「初戀CAFE等豪仔幫手，佳叔好好休息吓啊」、「仲要做佳叔？究竟可以為觀眾付出幾多」。
62歲鍾仔係著名體育及足球評述員，先後主持過9屆奧運會，對體育運動非常熟悉，旁述主持經驗豐富，觀眾喺今屆奧運初期就留意到鍾仔長時間做直播主持，好似唔使休息咁，更好奇問鍾仔係咪瞓喺直播枱下面，而鍾仔受訪時講過呢段期間係每日有兩個鐘瞓覺。
