丁子朗入行以嚟作多方面發展，但自細對藝術有濃厚興趣嘅佢，近日就不時喺社交平台分享畫作，因為嚟緊佢就會喺上環舉行首個個人畫展！
丁丁話為咗籌備呢個畫展用咗三年時間，近日忙於拍劇嘅佢都抽時間到畫廊為展覽打點，佢話平時畫畫都係收收埋埋，今次要拎出嚟畀大家睇，心情有啲緊張。
為咗今次畫展，丁丁準備咗十五至二十幅畫，當中最大面積嘅一幅前後畫咗兩年，而最快嘅一幅就畫咗兩個星期。丁丁話每次拍完劇之後就係畫畫最好時間，因為畫畫時可以清空腦袋放鬆，雖然過程係會攰，但非常享受。丁丁透露有新加坡同上海等地嘅收藏家，有意購入佢嘅作品作收藏，佢都希望可以畀多啲人認識自己嘅作品同讓多啲人作收藏之用。
