《毒舌大狀》榮獲第42屆金像獎最佳電影，更係香港電影史上首部破億票房，《毒舌大狀》著名導演吳煒倫呢日出席一個創意公關大賽嘅工作坊「與大師面對面交流」分享拍攝心得。
吳煒倫認為做導演並唔係大晒，做出決定後同時需要承擔責任，佢覺得一部成功作品，往往取決於每個崗位嘅用心同專業。吳煒倫強調細節係決定成敗關鍵：「由場地清潔、道具擺放到後期製作，每個環節都環環相扣，絕不能掉以輕心，唔好睇輕每一個好似好低階好卑微嘅位置，其實亦非常重要！」
吳煒倫認為挑選合適嘅人選擔當合適崗位至關重要，團隊合作去解決問題，亦需要創意同創作：「譬如我以《毒舌大狀》有一場戲為例，黃子華同林保怡喺一個球場拍攝，我哋最初拍嗰陣呢場戲係喺黃子華辦公室天台，拍完出嚟我總覺得唔夠好看，然後先發現原來係劇本出現問題，咁解決呢？」
吳煒倫坦言補拍經歷一波三折：「我寫呢場戲，黃子華睇咗，然後佢好快回覆『我知你想講乜，你介不介意我寫一次』，我當然唔介意，因為大家唔好忘記黃子華係編劇出身，每一個棟篤笑都由他自己寫，我當然信任他，那場戲我們就用了黃子華寫的版本。」
談到比賽同獎項，導演吳煒倫鼓勵同學們：「唔好為咗拎獎而去做事，最重要係享受創作過程。我經常覺得我自己做電影，金像獎入圍就當入遊樂場，你有提名就拎咗遊樂場嘅入場券入去玩吓，拎唔到你都要做，拎到又唔代表你下一部戲一定得。」佢認為獎項只係一個肯定，更重要係喺過程中學習同成長，不斷突破自我。「全港創意公關大賽2024」將於9月14日於生產力局舉行決賽，屆時各參賽隊伍將展示比賽成果，爭取各項大獎和獎學金，主辦單位希望透過比賽，培育更多優秀嘅公關人才，為香港公關行業注入新的活力。