終於可以向我哋不辭勞苦跑新聞嘅 Kimmi詹可琳 派福利喇！畀22位肌肉猛男包圍住，相信呢個體驗Kimmi都係第一次體會到呀！呢日TVB Plus全新節目《我推的野男Live！》，22位參賽猛男齊集，同四位主持胡蓓蔚、支嚳儀、陸浩明 同 火火出席拜神儀式，身為主持嘅 胡蓓蔚 豹嫂 同 支嚳儀 都忍唔住要同呢幅肌肉牆打卡呀！
豹嫂就爆連日嚟有唔少女藝人，都趁住拍攝空檔入錄影廠偷𥄫一眾猛男呀，而陸浩明就話自己身為男士都睇到流鼻血加流口水，仲話一眾參賽者越嚟越在狀態，大家彷彿好似操緊去奧運一樣呀。火火就話一眾參賽者入面咩類型都有，自己就等緊睇佢哋會帶嚟啲咩驚喜呀。
支嚳儀就話自己對眾參賽者有敬畏之心，喺綵排時見到佢哋嘅核心力量，令佢非常羨慕，仲話如果自己有呢鼓核心力量，可以唱歌都會更加勁呀。平日都有做開運動嘅豹嫂，完全明白佢哋要操到有而家嘅肌肉量係有幾難，身邊嘅陸浩明聞言就問豹嫂到時會唔會都騷下自己嘅人魚線？點知豹嫂就好大方咁話自己已經準備咗呀！
節目將於12號進行直播，有別於一般選美，觀眾可以按野男們各集嘅表現嚟投票，各位嘅分9亦會有所變動，幾位主持呢日就預告節目中嘅精彩競技內心喇。至於一眾猛男就話已經準備好，仲叫大家記得下載myTV SUPER嘅應用程式為佢哋投票呀。
