Eric Kwok（郭偉亮）早前宣布女團重組XiX，踢走成員莊殷玥（Vici），暗示老婆葉佩雯日前喺網上炮轟有人零尊重與此事有關，表示支持老婆，又指與Vici家人合作上難磨合，點知今日有一位網民喺網上鬧爆Eric Kwok，指Eric Kwok因唔滿意做出嚟嘅MV成品而唔找數，又聲稱佢哋兩公婆當日跟場乜都唔講，反而「拍完出埋先講」。
該網民喺網上發文聲稱幫手拍完MV傾好晒details，「片都出埋，你呢條女都踢走埋，而家同我講唔滿意做咗出嚟嘅嘢所以唔畀錢」，該網民又指「好多錢咩？已經cut咗budget啦。好心你哋兩公婆咪做咁多無謂嘢，要搞女團就plan好，自己唔識又要搵錢你去搵嗰顧問啦」。不少網民建議呢位「事主」報《東張》。
連日因XiX重組而被追訪嘅Eric Kwok同老婆葉佩雯，似乎未有受此事影響心情，今日喺IG貼出二人世界影片，原來佢哋慶祝相識24年，難得抽時間拍吓拖，就決定今餐飯唔傾公事、唔覆電話，好好享受呢餐慶祝飯， 更指感恩遇上對方，而家要並肩作戰一齊工作、互相勉勵。
