劇集《法證先鋒6 倖存者的救贖》沿用上集大部份演員同時，而法證部與重案組都加入咗唔少新面孔，其中馬貫東再演法證系列，不過就由犯人變成重案組嘅沙展，劇中要應付唔少打鬥戲份，同楊證樺梗加係埋身肉搏。
傅嘉莉同樣以全新角色亮相，仲好開心可以將之前所學嘅珠寶鑑證師技能發揮所長，因為劇中佢飾演珠寶設計師，過程都要辨認珠寶真偽，監製亦不時詢問佢實際程序應該點做。蔣祖曼亦加入法證系列，佢被安排嘅角色仲同之前有好大分別，為咗貼近名模身型，Joman都落足苦功，利用生酮飲食減咗十七磅。
由黃宗澤帶領嘅法證組加入咗新演員，包括戴祖儀、林正峰同郭珮文，兩位女神都讚Bosco好體貼，Joey就話演法證人員，搜證時要有步驟，好彩得到Bosco細心指導。首度拍劇嘅Juliana初時遇到迷茫，唔知要做乜，幸得Bosco教路。
林正峰話劇中不時要講專業名詞，令佢覺得有難度，好彩累積之前兩套劇飾演專業人士，今次就無咁緊張。阮嘉敏挑戰演女警角色，佢就為咗開槍動作而不時向身邊人或前輩演員請教。