林峯石澳衝浪全程細心照顧妻女 Luna換可愛美人魚裝跳舞

林峯喺2019年與張馨月結婚，2020年9月誕下女兒「格格」Luna，老婆張馨月婚後專心照顧家庭，佢噚日喺社交平台上載一家三口去石澳玩水嘅片，林峯愛女更挑戰第一次衝浪。

林峯一家抵達石澳先去附近一間餐廳食嘢醫肚，期間有人邀林峯合照，林峯亦有求必應跟大家影Selfie；然後林峯同老婆陪阿女玩沙，玩咗一陣忽然落大雨，佢哋企喺樹蔭下，打開一把戶外沙灘遮避雨，林峯更搞笑與友人保持優雅，無懼風雨一齊舉杯飲香檳，而張馨月就陪阿女玩沙。

之後女兒Luna換上可愛美人魚裝，阿女又跳舞又開心揮手，睇嚟好滿意呢身服飾，終於等到雨停，林峯一家趕緊落水玩，阿女Luna同張馨月都有玩衝浪，阿峯全程細心照顧妻女。