由 胡蓓蔚 支嚳儀 火火同 陸浩明 主持；一連22集嘅 TVB Plus 全新直播互動選秀騷《我推的野男LIVE！》，星期一正式播出。製作組已於社交平台發放22名參賽者嘅資料同宣傳照。
觀眾可於TVB、TVB Plus 嘅Facebook同IG專頁，揀選心水野男加分打氣。經觀眾投票後，率先備受關注嘅有2號關經翰（Oswald）、3號施顯澍（Austin），兩位面試時嘅絕密片段內容亦首次公開。
有「野男Rain」之稱；從事Model職業嘅3號Austin走韓系路線，佢喺接受面試時透露自細鍾意打波同做運動，喺美國留學8年期間愛上健身。Austin喺接受評判詢問時，直言參加比賽「係想做明星」。
擁有1.85米超高身材嘅Austin亦係22位野男中最高嘅其中一位，成為佢一大優點之一。Austin自言專長唱歌，更即場清唱張敬軒嘅《青春告別式》，唱到假音部份更穿透力十足！Austin又自爆喺社交平台頻頻收到唔少同性私訊，更有人會留大膽留言添。
任職投行經理嘅2號Oswald被稱為「筋肉霆鋒」，自言由細到大都「坐唔定」嘅佢運動履歷驚人！Oswald唔止係新西蘭體操國家隊，曾贏得新西蘭全國青少年男子藝術體操全能冠軍，2022年又贏過香港康文署社區網球甲級聯賽亞軍。
佢就分享自己認為嘅野男應具備條件︰「唔同情況都都要有自信同諗法，有能力面對唔同挑戰。」Oswald自爆喺中年女性圈子幾受歡迎，鬼仔性格嘅佢笑言︰「媽咪啲姊妹auntie都好鍾意我，之前拍拖女朋友嘅媽咪都好疼錫我。我比較吸引到中年女士。」
《我推的野男LIVE！》8月12號起 逢星期一晚 21:30 星期二晚 21:35 TVB Plus(82台)