超級英雄電影《死侍與狼人》早前上映，全球票房更逼近10億美元大關。而成為超級Fans嘅 ANSONBEAN 更喺電影上映前已開始籌劃港版「死侍與狼人武打篇」短片，融合中國武術格鬥，佢仲化身成為「狼人」，同武術指導Ace扮演嘅「Deadpool」鬥法。
共有3集嘅短片以真功夫加上後期CG特效，又有《填詞L》嘅視覺特效總監梁仲文操刀、攝影師Quinton拍攝，於網上播出後吸引數百萬點擊瀏覽，連美國舞蹈家Fik-Shun Stegall、Jean Robert Toussaint同Jennings Brower等網上名人都留言大讚。
ANSONBEAN今次自資五位數字，身兼創作、導演兼主演，一圓自己Marvel忠粉同武打慾望，為節省製作費，佢同Ace仲喺街頭、動漫節仲有電競場取景，期間又自度招式，更親身上陣亳不錫身演出，令圍觀拍攝嘅市民都嘆為觀止。
短片嘅結局篇已經公開，找來 泰妹楊雅文 聯合對付Deadpool，泰妹為支持Anson更係義務演出，佢話：「佢咁有心機整，都恭喜佢。我一向都想拍呢類武打嘅短片，但係我唔識統籌，同埋未有一個契機畀我，我哋有少少武術底子，可以隨時都喺街度就使出嚟，拍呢類片唔需要過重重難關，唔需要casting、唔需要保持身型 ，純粹拍自己想拍嘅嘢，拍出嚟短短幾秒嘅reels就可以inspire到觀眾，可以表現到自己嘅身手，我都好鍾意、好enjoy。」