馬國明一向童心未泯，作為經典卡通人物唐老鴨狂迷嘅佢，雖然唔多喺網上分享自己對呢個角色嘅熱愛，不過佢對鴨鴨嘅愛絕對未有因年歲漸長而消退，就連4年前開設社交平台嘅日子都揀喺唐老鴨嘅生日6月9號，就知佢對呢個角色愛得有幾深啦！
最近馬明就喺社交平台興奮出Post，分享收到連串唐老鴨90周年紀念周邊嘅靚相，原來係今年踏入90歲嘅唐老鴨同一個慈善基金合作，透過販賣慈善產品幫助重病兒童實現願望，令佢哋更積極正面勇敢抗病。作為鴨鴨狂迷嘅馬明不忘同鴨鴨屁股造型抱枕自拍，好友何遠東留言：「我睇得出你好滿足。」而馬明就直認「yes」表示開心。
馬明每次提到唐老鴨，佢嘅笑容都猶如小孩一樣開朗，佢曾受訪講過屋中擁有過萬件唐老鴨珍藏，家人亦喜歡唐老鴨，馬媽媽將唐老鴨當作「孫仔」，除咗為唐老鴨買BB衫、織冷衫，全家人每年都為唐老鴨買蛋糕為其慶祝生日，而馬爸爸會詢問「唐老鴨」能否讓座畀佢睇電視，而馬太湯洛雯愛屋及烏，亦變得鍾意唐老鴨。