不少家長喺暑假捉緊時間陪仔女去旅行，作為廿四孝好老竇嘅陳山聰，就算工作再忙，佢始終不忘抽空陪伴寶貝兒子霆軒（Jaco），盡情享受親子時光，近日山聰同阿仔出發去日本旅行，山聰笑指親子旅行同開早班冇分別，更搞笑地貼出阿仔睡眼惺忪嘅樣兼留言：「你都未瞓醒啦大佬！」
山聰今日喺IG動態分享多條阿仔嘅影片，見Jaco扮消防員救火、救護員急救做心外壓等角色，Jaco都跟足指示做得似模似樣，不過山聰見阿仔做完心外壓即撩鼻，阿爸山聰都忍唔住笑稱「救完人唔好撩鼻得唔得」。
出外旅行陪小朋友玩，有時難免有啲攰，山聰喺IG曬出兩張想恰眼瞓嘅相，先係問「可唔可以放我瞓覺」，另一張相見佢攬住條柱，自嘲係「柱男」仲問「有冇床呀」，相信唔少家人都可以體會到山聰嘅感受！
Jaco喺職業體驗樂園忙完一輪，食晚飯嗰陣即「斷電」秒睡，爸爸山聰笑稱：「你以為返工咁容易呀大佬。」山聰終於有MeTime，佢開心晒自拍照，見佢飲啤酒嘆海膽飯，終於可以享受美食！