丁子朗近日忙緊為自己人生首個畫展推廣，喺演藝事業之外開拓另一條藝術路，緊接佢又有新搞作，見丁丁喺社交平台上載多張為品牌拍攝內褲廣告嘅Model相片，身穿白色背心小露腹肌，又雙膝跪地解開褲頭鈕，擺出一副誘人甫士及眉眼展示內褲，呢批相見街後大獲好評，連好友麥美恩都留言姐姐開心，許文軒更讚丁丁擺甫士難度有10分。
喺徇眾要求下，丁丁再派福利，公開咗一條拍攝嘅花絮短片，赤膊騷出一排緊緻腹肌，見拍攝過程中丁丁需要作出大量姿勢調整同扭動，相信呢啲就係做Model背嘅辛酸。不過丁丁就好樂在其中，仲話：「我估做模特兒可以成為我兼職工作。」
現年27歲嘅丁丁喺2016年時參加《2016年度香港先生選舉》獲得亞軍、最上鏡先生及現場最受歡迎香港先生，當時就已經公開過泳褲look，一直佢對身材都好有要求，多年來保住健碩體態，間中都會post除衫相，名乎其實嘅肌肉擔當。今次有幸為國際知名品牌擔任Model丁丁一定準備充足，而且過往品牌搵嚟嘅模特兒都有一定知名度，好似BLACKPINK Jennie、BTS柾國、張藝興等都曾經接拍品牌廣告，意味住丁丁嘅名氣又再升級。
