1998年度香港小姐季軍吳文忻Nathaliie（現名吳忻熹）近日接受傳媒訪問時，親揭兩年前確診乳癌，今年復發已係第三期更擴散至淋巴。而從相片所見Nathaliie比過往消瘦，但精神仍然唔錯，並自稱日前因接受化療，導致聲音有啲沙講嘢中氣不足，可能一兩個禮拜之後就開始甩頭髮，而且冇力同身邊朋友交代，佢認為講出嚟係想畀自己多啲正能量去打呢場仗，同時希望醫好自己幫到人。
Nathaliie透露兩年前到美容院通淋巴時發現左胸有硬塊，經醫生詳細檢查後，證實確診乳癌，立刻透過做手術將癌細胞切除，由於當時唔算好大粒，加上正值農曆新年做完手術三日就出院，雖然當時醫生有建議佢做預防性化療，但Nathaliie最終選擇冇接受其它療程，只動咗手術及定期覆診。
另一方面Nathaliie諮詢唔同醫生意見，有醫生建議整個乳房切除一了百了，但Nathaliie拒絕咗，至今年發現復發已經第三期，同埋開始有啲去咗淋巴，正接受化療及免疫治療。Nathaliie坦言現時情緒時好時壞，尤其做完化療後會全身腰痠骨痛，唔想收埋自己喺屋企，更有種等死嘅感覺，又唔敢大喊，不停會反問點解會喺自己，所以覺得自己每日都要做啲嘢，例如研製食療幫自己身體去打仗及分享畀同路人。
Nathaliie喺2011年嫁金融才俊陳劍陵，生咗兩個女兒後就淡出幕前，本來一家過住幸福愉快生活，現時面對漫長嘅抗癌之路，最初佢收埋自己，只有老公知道其病況，連父母都唔知道，如今復發，經消化接受消息後，Nathaliie決意同女兒及親友交代，令佢最安慰係大女意識到發生咩事，大女變得好自立，又會幫手做家務，所以佢更要好好努力去打呢場仗。Nathalii仲透露現時體只得99磅，記得選港姐時都有101磅，從來未試過唔需要努力減肥就咁瘦。