郭富城（Aaron）一連13場演唱會正舉行如火如荼，第二場呢日繼續為觀眾帶嚟招牌勁歌熱舞，Aaron一直喺歌單上亦落足心機，希望唔同階段嘅經典歌曲都可以分段細唱，非常疼愛歌迷。
Aaron感謝歌迷一直支持，以前仲係小伙子未能完全理解某啲歌曲嘅歌詞，而家成家後心境成熟咗，編排演唱會流程再記歌詞嗰陣有新領悟，Aaron認為今次演唱會係重唱呢啲歌曲嘅最好時機，希望歌迷能透過歌曲感受到佢嘅心境。
Aaron為咗畀歌迷驚喜，每晚歌曲歌單稍微唔同，Aaron見第二場嘅歌迷反應非常熱烈，歌迷不斷歡呼及大合唱，特別係《狂野之城》、《我為何讓你走》、《愛的呼喚》大合唱熱選，氣氛熾熱。 
至於Aaron現場畫畫章節，歌迷亦非常喜歡，當Aaron 以《飛》一曲同步作畫時，歌迷更打拍子和應，非常支持Aaron以畫寄意嘅演出。 演唱會上Aaron亦趁機向歌迷撒嬌，排練嗰陣太落力，令佢撞瘀咗pat pat，全場歌迷立即報以震耳欲聾歡呼聲「呵返」。當Aaron獻唱送畀歌迷嘅新曲《您》 ，感受到歌迷對佢嘅厚愛，感動得眼框中充滿淚水，但佢仍然強忍淚水，歌迷則報以熱烈掌聲。
