鍾柔美空氣瀏海轉換新形象 朱智賢謝東閔放閃否認分手

鍾柔美Yumi近日正式加入劇組拍攝新劇，呢日抽空現身一個慈善晚宴活動，又要拍劇又要顧及演出，但見佢一啲都冇跌watt，仲剪咗一頭瀏海嘅新髮型，Yumi話雖然唔係好習慣，覺得有少少篤眼，但佢好鍾意呢個全新形象，希望粉絲們都會鍾意。Yumi喺12月就會踏入18歲正式成年，距離呢個日子越來越近，Yumi一聽到18歲即唉...咗一聲，佢覺得成年後有好有唔好，亦有好多嘢想做，但回想自己參加《聲夢傳奇》至今唔經唔覺已經3年，覺得自己成長咗唔少。

為活動擔任主持嘅朱智賢同梁敏巧Maggie一同以晚裝現身，相比之下Maggie嘅身材非常之突出。而朱朱同男友謝東閔相繼離巢娘家外闖發展，雖然事業暫未見突破，但近日屢傳分手消息，有指朱智賢已經搬離愛巢，呢日謝東閔特意現身活動撐女友場，兩人默契地否認分手之說，指情侶關係不變大家生活如常，唔明白點解成日都傳佢哋分手。