啱啱湯怡同老公麥秋成，仲有囡囡麥QQ去咗日本旅行，連日嚟佢都有喺社交平台分享旅行照，由於當地天氣相當炎熱，經常以小背心出動嘅湯怡，都話體感有四十度嘅天氣，時時刻刻都喺爆汗狀態，不過網民喺欣賞湯怡靚相嘅同時，亦都留意到佢身形暴瘦，令唔少網民都好擔心，仲紛紛留言表示關心「太瘦喇，要食多啲嘢啊」、「保重身體呀，瘦得太犀利啦」、「瘦到有點心痛，多食一點，健康才是最美」、「太太太太瘦啦﹗老公無比飽飯你食? 」
見到大家咁擔心佢嘅健康，湯怡都有作出回應，佢話：「個個都問點解我瘦咗咁多？但其實呢我呢十年嚟都無變過，十年前仲瘦過而家十磅添，而我由細到大都係好骨感的，只係可能大家以前未留意到，自問我食嘅嘢都幾多，但就算我食幾多都要吸引到先得，無論點都好，身體健康就好了。」
除此之外，湯怡一家遊日嗰陣，咁啱日本發生地震，再加上當地發出巨大地震預警，所以佢話家人同朋友都好擔心佢哋，但話佢哋一家三口已平安回家，成功避過地震與停電一劫，仲話所有事情都有最好的安排。
