當年已6歲參加《殘酷一叮》淡定唱《習慣失戀》連 劉德華 都比出唔錯分數嘅 莫凱謙 ，轉眼已經由當年嘅小莫生變身26歲嘅真．莫生。當年參加節目之後莫生曾經為TVB拍過唔同劇集同參與節目演出，後來慢慢大個之後就專注學業，後來更於中文大學新傳系畢業。
不過一直以來莫生嘅音樂夢就未停過，近年繼續音樂發展，不時都會推出自己創作嘅歌曲，早前又為《聲夢》成員 林沚羿 改編歌曲，又為《中聲2》嘅尹新傑彈琴伴奏。
近日莫生亦再推出新一首創作歌曲《理得你話我蠢》，佢仲自己一手包辦曲、詞、編、監。莫生話新歌主題鼓勵係想大家，以大無畏嘅勇氣繼續追尋自己夢想，不論係普通上班族定係想成為全職音樂人，都可以昂然堅決做自己。
佢又坦言，當年參加《殘酷一叮》後成為童星，多年來雖然一直於娛樂圈浮沉，近年發展更麻麻。同新團隊合作嘅佢，回到起點重新振作，創作出《理得你話我蠢》。佢仲話新歌唔止係一首音樂作品，仲係見證佢由當年電視節目到今日，鼓勵大家勇敢面對人生中嘅挑戰。
佢仲話要感謝家人一直以來嘅支持：「屋企人喺我畢業後，從無催促我要搵一份朝九晚五嘅正職，呢個已經係最大的支持。」