前港姐 吳文忻 Nathaliie（現名吳忻熹）早前於訪問中公開自己乳癌復發一事，並透露現時癌細胞已擴散至淋巴，而自己亦積極抗癌，接受化療及免疫治療。連日嚟Nathaliie都有喺自己嘅社交帳號中分享化療後嘅狀況同心情，而今日（22日）佢再post出一段短片，表示自己接受第三次化療後，開始出現脫髮問題。
Nathaliie於片中表示最初以為自己可以打破甩頭髮嘅宿命，因為佢剛開始第三次化療時，仍未出現脫髮問題，當時佢仲以為係自己服用嘅保健產品嘅功勞，但直到今日佢朝早起床梳頭時，先發現頭髮開始大把大把掉落，而喺片中Nathaliie更係邊講邊用五指梳理頭髮，之後更展示出今日甩咗嘅髮量畀大家睇。
雖然面對脫髮，但Nathaliie仍保護樂觀心態，佢仲講笑咁話自己嘅頭髮就好似禾稈草，所以要唔要都罷，所以即使甩頭髮都唔需要介懷。Nathaliie又分享早前有朋友曾提議佢喺甩頭髮前不如先下手為強，率先將頭髮剪短，不過Nathaliie就話因為自己髮質嘅問題，剪短後嘅髮型好難睇，佢仲晒出自己細個時短髮嘅相片，笑言當時髮型就好似一個頭盔一樣。
Nathaliie喺片中表示自己有啲期待自己光頭嘅樣，同時又話聽朋友講，新生出嚟嘅頭髮會比之前嘅更好，所以自己都好期待，仲話咁樣都算係因禍得福呀。
