嚟緊25號就係黃浩然嘅49歲生日，唔知網民們係咪想為佢贈興，考古咁post出佢96年為雜誌影嘅model相，唔少網民睇完都話相當有驚喜。
先唔講相中一言難盡嘅穿搭服飾，單係黃浩然梳住九一分界、及肩嘅髮型，再配以45度斜睥向上望嘅眼神，真係冇返咁上下靚仔都好難carry到呀。唔少網民見到黃浩然呢張舊相後，都話佢呢個髮型同當年嘅王傑一模一樣，亦有人指佢同當年中長頭髮嘅古天樂撞造型。
不過準壽星黃浩然就冇理網上嘅舊照post，佢噚晚同埋老婆以及兩個囝囝去咗睇郭富城嘅演唱會嚟慶祝農曆生日，事後仲喺社交平台晒出演唱會嘅相，又喺帖文中放閃：「今晚聴到《愛的呼喚》時，黃太握著我的手，在我耳邊說『老公，生日快樂』時，真的很感動，真的很『感恩』，因為我們一家人都很快樂！❤️」
