港泰混血嘅靚女 鄺玲玲 因為參予《沖遊泰國》而令大家眼前一亮，佢近日擔正參演嘅GL劇《我們的秘密》爆紅，扮演皮膚科醫生嘅佢近日仲返嚟成長地香港舉行見面會。
被Roger胡慧沖稱呼為叉燒姐嘅鄺玲玲喺香港出世讀書，直至17歲先返泰國升學居住，2018年大學畢業後參加地方選美奪冠，後來經試鏡加入當地電視台，參演唔同劇集演出，前年於愛情劇《親愛的瑪卡莉》扮演可愛精靈首次擔正女主角，又現身《復刻古靈精怪東南亞：泰國篇》開始為港人熟悉。
今年佢同新生代泰國女演員Kornnaphat Sethratanapong(Orm)合作演出《我們的秘密》扮演一對一見鍾情嘅愛侶，後來Orm突然不知所蹤，劇集大受歡迎之餘，仲被認為係打破當地BL劇嘅壟斷局面，仲被譽為係「GL劇嘅天花板」。
雖然已貴為賣座劇女一，不過玲玲早前仍再次現身新一輯《沖遊泰國》，Roger仲大讚玲玲依舊親切清純，仲回應網友指玲玲工作廣告接洽不斷，肯幫手參與絕對係重情嘅表現，所以更加感謝佢呀。
